On the stage is 90 year old Charles Aznavour. A man of limited height but with a voice twice his size and a presence out-sizing the Royal Albert Hall. Amazing.
Yesterday when I was young
The taste of life was sweet as rain upon my tongue
I teased at life as if it were a foolish game
………………………………………….
And only now I see how the years ran away
Yesterday when I was young
………………………………………….
There are so many songs in me that won’t be sung
I feel the bitter taste of tears upon my tongue
The time has come for me to pay for yesterday when I was young.
Dit gebeur soms dat ‘n mens iets beleef en dan weet jy, hierdie belewenis sal lewenslank by my bly. Terwyl ek na hierdie klein mannetjie luister, word ek meer en meer bewus van die grootsheid van hierdie ervaring.
Geen programme is beskikbaar nie. Wat hou hierdie aand in? ‘n Gaskunstenaar open die aand met 30min Jazz/kabaret en dan ‘n pouse. Sekerlik kan ‘n mens nie van ‘n 90-jarige ou man verwag om die hele aand op te tree nie. Ek beplan die res van die aand. Hy sal seker nou vir ‘n halfuur optree, dan weer ‘n gaskunstenaar en dan sluit hy af met twee of drie items. Pouses tussenin behoort die tyd op te maak. Baie Franse hier rondom ons. Ek wonder of hulle almal plaaslik woon.
‘n Halfuur pouse. Hierdie orkes het ritme en volume. Sal Charles Aznavour hoorbaar wees bo die orkes? Gaan hy teen ‘n kierie of teen ‘n stoel leun om hom te ondersteun? Ek hoop nie hy kom iets oor terwyl hy optree nie.
En dan met ‘n flink huppelstap kom hy op die verhoog. Ek sit vasgenael. Negentig? Merkwaardig dat ‘n mens op so ‘n ouderdom nog met soveel energie kan beweeg.
Met ‘n ferm, helder stem begin hy sing . Ek herleef my altydse liefde vir Franse musiek: Francoise Hardy, Yves Montand, Edith Piaff, Jacques Brel; maar hierdie is beter…. dieper in my binneste. Ek wil lag, nee huil, nee geen emosie kan hierdie oomblik vasvang nie. Hierdie man is merkwaardig.
Die aand groei tot een van daardie groot oomblikke in my lewe.
Oomblikke soos toe ek as 8/9 jarige dogtertjie saam met Mamma en Pappa na die Weense Seunskoor gaan luister het en ‘Little Drummer boy’ saam met my huis toe gegaan het en my nou nog terugneem na De Aar se stadsaal toe. Dit moes baie sente omdraai gekos het, maar dit was my ma se begeerte om vir my hierdie geleentheid te kon gee. Hoe graag sou ek op hierdie stadium vir haar wou dankie se!
Of die keer wat KRUIK konsessies aangebied het waarmee skoolkinders 4 konserte per jaar kon bewoon wat selfs vir ‘n arm kind toeganklik was. Die eerste konsert was Hoogtepunte uit Cosi FanTutti en Verhale van Hoffman. Wonderlike kostuums en Barcarolle het my vergesel droomland toe. My eerste kennismaak met lewendige verhoog, musiek en toneelspel. Tot hiertoe was opera/operette beperk tot my Pa se langspeelplate en sy mooi baritonstem wat so nou en dan ‘n onverwagse draai deur die huis gemaak het.
En wat van die Graaff Reinetse Onderwyskollege se Fledermaus? Die pragtige sopraan en Mein Herr Marquis het my laat dagdroom oor my toekoms as student en wereldberoemde sangeres (sug!).
Ek was egter ook meegevoer deur sport. Die geleentheid om ‘groot’ te mag wees en kind-alleen die boxing day sport in die Paarl te kon bywoon; in die omgewing van March Fiasconaro en Paul Nash te mag wees en daarna my pad deur die mensemoes kon terugvind na Ouma se huis in die Hoofstraat; my ma wat verlig is dat ek veilig tuis is…. en die reuk van wintergreen wat rondom my stralekrans.
As opkomende Wimbledon enkelspelkampioen, het ek egter my belowende tennisloopbaan laat vaar na die vertoning van Virginia Wade se spel in die suikerreeks in Port Elizabeth. Ek het geen aspirasies gehad om my tennisraket te gooi (gooi is eufemisties gestel) dat hy wipwipwip oor die tennisbaan trek nie.
My hoogste hoogtepunt was waarskynlik op St Georgespark in Port Elizabeth en dit was nie vir krieket nie. Ek kan glad nie onthou saam met wie ek na Nicky Cruz gaan luister het nie. My ervaring van ‘n groot, magtige, liefdevolle Vader kon ek saam met duisende ander gelowiges beleef en met volle oorgawe sing: ‘All over the world the spirit is moving’. Ek wou nog en nog sing en sommer daarvandaan af reguit hemel toe gaan om net te kon aanhou met sing en die teenwoordigheid van die Here vir altyd so te kon beleef.
Natuurlik was daar nog meer wonderlike oomblikke, maar Charles Aznavour kry vanaand sy plek in my boek van herinneringe.
Na 90 minute ononderbroke optrede is sy stem helderder en duideliker as aan die begin van die aand. Die aand loop uit: Yesterday when I was Young. Sy verhoogpersoonlikheid, die hier en daar se eenbeenspringetjie, die lag in sy stem, oogkontak met die gehoor….nee, ek sal dit nooit vergeet nie. Maar, die weggesteekte kort treetjies, die hand wat bewe, die ‘kom-ons-begin-weer’ gemiste inval, bevestig die mens se verganklikheid.
Traag verlaat ek die gehoorsaal. Buite wag die laaste oomblikke van een van daardie uitsonderlike lekkerweer dae in London. Ons stap na East Kensington moltreinstasie toe met min woorde. Die Franse is op pad StPancras toe vir die Eurorail terug na Parys.
‘n Psigiaterkennis van Italiaanse afkoms is in die trein. Wat?! Was julle by Charles Aznavour? Hoe kon ek dit gemis het! En van die oorkantste bank kom ‘n eg Engelse jammer-maar-ek-wil-nie-‘intrude’-nie vrouestem: Ek was ook daar.
Charles Aznavour, jy bind die hede en verlede saam, bind oud en jonk saam, bind verskillende taalgroepe saam. Ek salueer jou.